लुम्बिनी लायन्स एनपिएलको फाइनलमा, उपाधिका लागि सुदूरपश्चिमसँग भिड्ने

काठमाडौं । लुम्बिनी लायन्स दोस्रो संस्करणको नेपाल प्रिमियर लिग (एनपिएल) को फाइनलमा प्रवेश गरेको छ । बिहीबार कीर्तिपुरस्थित त्रिवि क्रिकेट मैदानमा भएको दोस्रो क्वालिफायर खेलमा विराटनगर किंग्सलाई ४० रनले पराजित गर्दै लुम्बिनीले पहिलो पटक फाइनल यात्रा तय गरेको हो ।

अब उपाधिका लागि लुम्बिनीले शनिबार सुदूरपश्चिम रोयल्ससँग प्रतिस्पर्धा गर्नेछ । यसअघि भएको पहिलो क्वालिफायरमा विराटनगरलाई नै हराएर सुदूरपश्चिम फाइनलमा पुगिसकेको छ ।

जितका लागि १ सय ३५ रनको सामान्य लक्ष्य पछ्याएको विराटनगर १७.५ ओभरमा ९४ रनमै अलआउट भयो । पावर प्लेमै ३ विकेट गुमाएर दबाबमा परेको विराटनगरका लागि साम ह्याजलेटले ३४ रन बनाए । नरेन भट्टले २१ र मर्सेन्ट डी लन्जले १७ रन जोडे पनि टोलीलाई हारबाट जोगाउन सकेनन् । अन्य ब्याटरले दोहोरो अंकमा रन बनाउन सकेनन् ।

विराटनगरको ब्याटिङ लाइन ध्वस्त पार्न लुम्बिनीका तिलक भण्डारीले ३ विकेट लिए । उनी खेलको 'प्लेयर अफ द म्याच' घोषित भए । त्यस्तै रुबेन ट्रम्पलम्यान, जेजे स्मिथ र अभिषेक गौतमले समान २–२ विकेट हात पारे । शेर मल्लले १ विकेट लिए ।

यसअघि टस हारेर ब्याटिङको निम्तो पाएको लुम्बिनीले निर्धारित २० ओभरमा ८ विकेट गुमाउँदै १ सय ३४ रन बनाएको थियो । टोलीका लागि डी आर्की सर्टले ४५ रनको योगदान दिए । ४१ बल सामना गरेका उनले ३ चौका र १ छक्का प्रहार गरे । कप्तान रोहित पौडेलले ३४, निरोशन डिकवेलाले २९ र रुबेन ट्रम्पलम्यानले ११ रन बनाए । ओपनर दिनेश अधिकारी र दिलिप नाथ १–१ रनमै आउट हुँदा सन्दीप जोरा र जेजे स्मिथले खाता खोल्न सकेनन् ।

बलिङतर्फ विराटनगरका सुवास भण्डारी र प्रतिश जिसीले ३–३ विकेट लिए । ४ ओभर बलिङ गरेका सुवासले १४ र प्रतिशले २७ रन खर्चिए । सन्दीप लामिछानेले २ विकेट लिए ।