पोखरा ।
नेपालको प्रतिष्ठित र अग्रणी आतिथ्य ब्राण्ड सोल्टी होटेल्स एण्ड रिसोर्ट्सले पर्यटकीय राजधानी पोखरामा आफ्नो भव्य उपस्थिति जनाउने घोषणा गरेको छ। समूहले आफ्नो समकालीन ‘वेस्टेण्ड’ ब्राण्डअन्तर्गत ‘सोल्टी वेस्टेन्ड लेकसाइड, पोखरा’ को व्यवस्थापन तथा सञ्चालन गर्ने भएको हो। यसका लागि सोल्टीले होटेल पेनिन्सुला प्रा.लि.सँग एक रणनीतिक व्यवस्थापन सम्झौतामा हस्ताक्षर गरेको छ, जसले पोखराको प्रतिस्पर्धी पर्यटन बजारमा एक नयाँ अध्यायको सुरुवात गरेको छ।
पोखराको सबैभन्दा जीवन्त र आकर्षक क्षेत्र लेकसाइडको मुटुमा, फेवातालबाट केही कदमको दूरीमा अवस्थित यो होटेल सन् २०२५ को सेप्टेम्बरदेखि बुकिङका लागि खुला गरिने तयारी छ। यो होटेलले समकालीन आतिथ्य सत्कारमा नयाँ दृष्टिकोण प्रस्तुत गर्दै स्वदेशी तथा विदेशी पर्यटकलाई अनुपम अनुभव प्रदान गर्ने लक्ष्य राखेको छ। गण्डकी प्रदेशमा सोल्टीको यो विस्तारले समूहको सेवा सञ्जाललाई थप फराकिलो बनाएको छ।
७७ वटा प्रिमियम अतिथि कोठाहरू रहने यस होटेलमा पाहुनाको आराम र सुविधालाई विशेष ध्यान दिइएको छ। होटेलमा एउटा अत्यन्तै आरामदायी प्रेसिडेन्सियल सुइट र ६ वटा जुनियर सुइटसहितका कोठाहरू रहनेछन्, जसलाई आधुनिक शैली र उत्कृष्ट पर्यटकीय सुविधाहरूको संयोजन गरी डिजाइन गरिएको छ। होटेलको मुख्य आकर्षणहरू मध्ये एक यसको ‘रुफटप बार’ हुनेछ, जहाँबाट पाहुनाले अन्नपूर्ण हिमश्रृंखलाको मनमोहक दृश्यावलोकन गर्दै विभिन्न परिकारको आनन्द लिन सक्नेछन्।
व्यावसायिक तथा सामाजिक कार्यक्रमहरूका लागि पनि होटेलले विशेष व्यवस्था गरेको छ। यहाँ २५० जना अट्ने क्षमताको पूर्ण सुसज्जित सभाहल, बैठक कक्षहरू तथा प्रीतिभोज आयोजना गर्ने स्थान उपलब्ध हुनेछ। यसका साथै, स्वास्थ्य र आनन्ददायी विश्राम खोज्नेहरूका लागि स्वीमिङ पुल, अत्याधुनिक हेल्थ क्लब र शान्त स्पाको व्यवस्था रहनेछ। होटेलले पारिवारिक बिदा, रोमान्टिक यात्रा वा व्यावसायिक बसाइ, सबै प्रकारका पाहुनाहरूको आवश्यकतालाई सम्बोधन गर्ने गरी आफूलाई एक समावेशी गन्तव्यको रूपमा विकास गरेको छ।
सम्झौता हस्ताक्षर कार्यक्रममा सोल्टी होटेल लिमिटेडका उपाध्यक्ष सुदर्शन चापागाईं र होटेल पेनिन्सुला प्रा.लि.का संस्थापक तथा कार्यकारी अध्यक्ष खिम बहादुर ढकालले हस्ताक्षर गरेका थिए। उपाध्यक्ष चापागाईंका अनुसार, यो साझेदारी सोल्टी ब्राण्डप्रतिको विश्वास र प्रतिष्ठाको प्रतिबिम्ब हो। उनले भने, “नेपालका उत्कृष्ट पर्यटकीय गन्तव्यहरूमा आफूलाई स्थापित गर्ने हाम्रो दीर्घकालीन लक्ष्यलाई यसले साकार पारेको छ। सोल्टी वेस्टेन्ड लेकसाइडले समकालीन वास्तुकला, आत्मीय सेवा र स्थानीय सांस्कृतिक अनुभवको अद्वितीय संयोजनमार्फत सोल्टी ब्राण्डको विशिष्टतालाई जीवन्त बनाउनेछ।”
यो नयाँ विस्तारसँगै सोल्टी होटेल्सले गण्डकी प्रदेशमा आफ्नो उपस्थितिलाई थप सुदृढ बनाउँदै पोखराको बढ्दो प्रतिस्पर्धात्मक बजारमा अतिथि तथा पर्यटकहरूका लागि एक विशिष्ट र पहिलो रोजाइको विकल्प बन्ने बलियो विश्वास लिएको छ।
१० साउन २०८२, शुक्रबार ०८:०३ मा प्रकाशित
