लाइसेन्सको अवधि दोब्बर, अब १० वर्षसम्म नवीकरण गर्नु नपर्ने

पोखरा। सरकारले लाखौं सवारी चालकलाई राहत दिँदै सवारी चालक अनुमतिपत्र (लाइसेन्स) को अवधि दोब्बर बनाएको छ। अब लाइसेन्सको म्याद ५ वर्षको सट्टा १० वर्ष कायम हुनेछ, जसले गर्दा पटक-पटक नवीकरण गर्नुपर्ने झन्झट अन्त्य भएको छ।

सवारी तथा यातायात व्यवस्था ऐन, २०४९ मा संशोधन गर्दै सरकारले यो नयाँ व्यवस्था लागू गरेको हो। नेपाल राजपत्रमा सूचना प्रकाशित भएसँगै यो नियम औपचारिक रूपमा कार्यान्वयनमा आएको छ। यसले चालकहरूलाई सुविधा दिनुका साथै यातायात कार्यालयहरूमा हुने भीडभाड कम गर्न समेत मद्दत पुग्ने विश्वास गरिएको छ।

राजपत्रमा प्रकाशित ‘केही नेपाल ऐनलाई संशोधन गर्न बनेको ऐन’ अनुसार, पुरानो ऐनको दफा ५४ को उपदफा ३ र दफा ५६ को उपदफा ३ मा रहेको ‘पाँच वर्षसम्म’ भन्ने शब्दावलीलाई ‘दश वर्षसम्म’ ले प्रतिस्थापन गरिएको छ।

यो नयाँ व्यवस्था लागू भएसँगै अब जारी हुने नयाँ लाइसेन्सको अवधि १० वर्षको हुनेछ भने पुराना लाइसेन्स पनि नवीकरण गरेपछि १० वर्षका लागि मान्य हुनेछन्।