लागुपदार्थ सेवन गरी गाडी चलाउने ४ पक्राउ

स्याङ्जा । स्याङ्जाको पुतलीबजार नगरपालिका १ स्थित बसपार्क क्षेत्रमा लागुपदार्थ सेवन गरी सवारी साधन चलाउने चारजना चालकलाई प्रहरीले नियन्त्रणमा लिएको छ । सिद्धार्थ राजमार्गको सडक खण्डमा चेकजाँचका क्रममा उनीहरु पक्राउ परेका हुन् । जिल्ला प्रहरी कार्यालय र जिल्ला ट्राफिक प्रहरी कार्यालय स्याङ्जाबाट खटिएको टोलीले चैत १६ गते दिउँसो करिब २ः५० बजे उनीहरुलाई नियन्त्रणमा लिएको हो ।

सडक दुर्घटना न्यूनीकरण गरी यात्रालाई सुरक्षित, मर्यादित र भरपर्दो बनाउने उद्देश्यले प्रहरीले निजी तथा सार्वजनिक सवारी साधनका चालकहरुमाथि चेकजाँच गरेको थियो । पक्राउ पर्नेमा तनहुँको भिमाद नगरपालिका २ का २७ वर्षीय मोहन थापा छन् । ग ३ च ५८५ नम्बरको बोलेरो जिप चलाइरहेका थापाको साथबाट ५ ग्राम गाँजा समेत बरामद भएको प्रहरीले जनाएको छ ।

त्यसैगरी पाल्पाको तानसेन नगरपालिका २ का २० वर्षीय विपिन कुवरलाई पनि प्रहरीले नियन्त्रणमा लिएको छ । लु ८३ प ७६ नम्बरको मोटरसाइकल चलाएका कुवरको साथबाट पनि ५ ग्राम गाँजा फेला परेको छ । लागुपदार्थ सेवन गरी सवारी चलाउने अन्य चालकहरुमा स्याङ्जाको भिरकोट नगरपालिका १ का २० वर्षीय प्रमिस केसी र कास्कीको पोखरा महानगरपालिका ११ का ४३ वर्षीय रिकेश परियार रहेका छन् । केसीले ग १० प ८६९७ नम्बरको मोटरसाइकल र परियारले ग १ ख ९१२४ नम्बरको हाइस चलाइरहेका थिए ।

पक्राउ परेका सबैलाई नियन्त्रणमा लिएर थप अनुसन्धान तथा कानुनी कारबाही प्रक्रिया अगाडि बढाइएको जिल्ला प्रहरी कार्यालय स्याङ्जाका सूचना अधिकारी एवं प्रहरी नायव उपरीक्षक प्रसन्नराज चौधरीले बताए । प्रहरीले सडक सुरक्षाका लागि यस्ता चेकजाँचलाई निरन्तरता दिने जनाएको छ । उनीहरुलाई नियन्त्रणमा लिएर थप अनुसन्धान अघि बढाइएको प्रहरीको भनाइ छ ।