बालिकालाई ‘ब्याड टच’ गरेको आरोपमा पोखरा–वालिङ चल्ने जिपका चालक पक्राउ

स्याङ्जा ।  यात्रुलाई दुर्व्यवहार गरेको आरोपमा प्रहरीले सार्वजनिक जिपका एक चालकलाई पक्राउ गरेको छ । पोखराबाट वालिङतर्फ जाँदै गरेको जिपमा सवार १६ वर्षीया बालिकालाई ‘ब्याड टच’ (अस्वाभाविक व्यवहार) गरेको आरोपमा उनी पक्राउ परेका हुन् ।

पक्राउ पर्नेमा स्याङ्जाको बिरुवा गाउँपालिका–७ यादी बस्ने ४९ वर्षीय अनबहादुर गुरुङ रहेको जिल्ला प्रहरी कार्यालय स्याङ्जाले जनाएको छ । गुरुङले चलाएको ग १ ज ७०६६ नम्बरको जिपको बायाँतर्फको सिटमा बसेकी बालिकामाथि मंगलबार दिउँसो करिब साढे ४ बजे उनले दुर्व्यवहार गरेका थिए ।

घटनाको जानकारी पाएलगत्तै वडा प्रहरी कार्यालय वालिङ र अस्थायी प्रहरी पोस्ट रामबाच्छाबाट खटिएको टोलीले वालिङ नगरपालिका–१ रामबाच्छाबाट चालक गुरुङलाई नियन्त्रणमा लिएको हो ।

जिल्ला प्रहरी कार्यालयका सूचना अधिकारी एवं प्रहरी नायव उपरीक्षक प्रसन्नराज चौधरीका अनुसार पक्राउ परेका गुरुङविरुद्ध बालयौन दुरुपयोग कसुर मुद्दा दर्ता गरिएको छ । जिल्ला अदालत स्याङ्जाबाट बुधबार ७ दिनको म्याद थप अनुमति लिएर यस विषयमा थप अनुसन्धान अगाडि बढाइएको प्रहरीले जनाएको छ ।