म्याग्दीका उम्मेदवारको साझा मुद्दा : ढोरपाटन हुँदै पूर्वी रुकुम जोड्ने ‘वैकल्पिक सडक’

म्याग्दी– आसन्न प्रतिनिधिसभा सदस्य निर्वाचनमा म्याग्दीका उम्मेदवारले जिल्लाको पश्चिमी क्षेत्र भएर ढोरपाटन हुँदै पूर्वी रुकुम जोड्ने वैकल्पिक सडक निर्माणलाई मुख्य चुनावी एजेन्डा बनाएका छन् ।

मध्यपहाडी लोकमार्गको बागलुङ खण्डको तुलनामा म्याग्दी भएर ढोरपाटन हुँदै पूर्वी रुकुम पुग्ने सडक ६५ देखि ७० किलोमिटर छोटो पर्छ । दूरी छोटो पर्ने भएकाले वैकल्पिक सडक बनाउन सके पर्यटन, सामाजिक तथा आर्थिक क्षेत्रमा कायापलट हुने नेपाली कम्युनिस्ट पार्टीका उम्मेदवार अर्जुन थापाले बताए ।

यसअघिका तीनवटा निर्वाचनमा दलहरूले सदरमुकाम बेनीबाट उत्तरी क्षेत्रको रघुगंगा र अन्नपूर्ण गाउँपालिका हुँदै मुस्ताङको कोरला नाका जोड्ने सडकलाई प्राथमिकता दिएका थिए । उक्त प्रतिबद्धता पूरा भएपछि अहिले नेताहरूले राहुघाट–म्याग्दी चक्रपथ र ढोरपाटन हुँदै पूर्वी रुकुम जोड्ने मार्गलाई मुद्दा बनाएका हुन् ।

बेनीबाट घतान, पात्लेखेत, झिँ, पाखापानी, ठाडाखानी, कुइनेमंगले, मल्कवाङ, मराङ, बिम, दरबाङ हुँदै बेनीसम्मका ५ वटा स्थानीय तह समेट्ने राहुघाट–म्याग्दी चक्रपथ आयोजना पनि प्राथमिकतामा परेको छ ।

नेपाली कांग्रेसका उम्मेदवार कर्णबहादुर भण्डारीले बेनी–जोमसोम–कोरला सडक सहज हुँदा वार्षिक ८ लाखभन्दा बढी पर्यटक भित्रिएको उदाहरण दिँदै पश्चिमी र राहुघाट क्षेत्रमा पूर्वाधार बढाए बसाइँसराइ रोकिने र रोजगारी सिर्जना हुने बताए ।

नेकपा (एमाले) का उम्मेदवार हरिकृष्ण श्रेष्ठले नागरिकको माग र स्थानीय आवश्यकताका आधारमा रणनीतिक महत्त्वका सडक योजनालाई प्राथमिकता दिने उल्लेख गरे ।

बेनीबाट ७५ किलोमिटर यात्रा गरेर ढोरपाटन पुग्न सकिने यो सडकलाई पश्चिम म्याग्दीको विकासको आधार मानिएको छ । हाल प्रयोगमा रहेको बागलुङबाट ढोरपाटन जोड्ने सडकको दूरी १ सय २६ किलोमिटर छ । विसं २०५५ मा निर्माण सुरु भएको यो सडकको बेनी–मुना–खोरिया–मरेनी हुँदै जलजलासम्म करिब ६४ किलोमिटर मार्ग यसै वर्ष खुलेको हो ।

पूर्वी रुकुमको तकसेराबाट ढोरपाटनको निसिलढोरसम्म ८ किलोमिटर सडक जोडिन बाँकी छ । म्याग्दी उद्योग वाणिज्य संघका अध्यक्ष सुविन श्रेष्ठले पर्यटक तथा स्थानीयका लागि छोटो पर्ने यो मार्ग खुलाउनु जिल्लाको साझा मुद्दा बनेको बताए ।

प्रदेश सरकारले दरबाङबाट ताकम मुना जोड्ने करिब १७ किलोमिटर सडक स्तरोन्नति गर्न दुई वटा शीर्षकमा योजना सञ्चालन गरेको छ । पूर्वी रुकुम, म्याग्दी र बागलुङ जिल्लाको १ हजार ३२५ वर्गमिटर क्षेत्रफलमा फैलिएको नेपालको एकमात्र सिकार आरक्ष ढोरपाटन पछिल्लो समय आन्तरिक पर्यटकको पनि रोजाइमा परेको छ ।