मधेसको मुख्यमन्त्रीमा कांग्रेसका कृष्णप्रसाद यादव नियुक्त

जनकपुरधाम ।  मधेस प्रदेशको मुख्यमन्त्रीमा नेपाली कांग्रेस मधेस प्रदेश संसदीय दलका नेता कृष्णप्रसाद यादव नियुक्त भएका छन् । प्रदेश प्रमुख डा. सुरेन्द्र लाभ कर्णले शुक्रबार यादवलाई मुख्यमन्त्री पदमा नियुक्त गरेका हुन् ।

नियुक्तिअघि शुक्रबार नै यादवले ७ दलका ७७ जना प्रदेशसभा सदस्यको समर्थनसहित प्रदेश प्रमुखसमक्ष दाबी पेस गरेका थिए । यादवलाई मुख्यमन्त्री बनाउन जनता समाजवादी पार्टी (जसपा) नेपाल, जनमत पार्टी, नेकपा (माओवादी केन्द्र), लोकतान्त्रिक समाजवादी पार्टी (लोसपा) र नेकपा (एकीकृत समाजवादी) ले समर्थन जनाएका छन् ।

संविधानको धारा १६८ को उपधारा ३ बमोजिम नियुक्त निवर्तमान मुख्यमन्त्री सरोजकुमार यादवले पदबाट राजीनामा दिएपछि नयाँ सरकार गठनको प्रक्रिया सुरु भएको थियो । प्रदेश प्रमुख कर्णले बुधबार सर्वोच्च अदालतको परमादेश अनुसार नेपालको संविधानको धारा १६८ को उपधारा २ बमोजिम दुई वा दुईभन्दा बढी दलको समर्थनमा नयाँ सरकार गठनका लागि आह्वान गरेका थिए ।

मुख्यमन्त्रीमा नियुक्त भएपछि यादवले आफू प्रदेशको पाँचौं मुख्यमन्त्री भएको भन्दै विगतका सरकारले गरेका राम्रा कामलाई निरन्तरता दिने र कमिकमजोरी सच्याउँदै अघि बढ्ने प्रतिबद्धता जनाए । उनले भने, ‘मुख्यमन्त्री हेरफेरका लागि भएका गतिविधिले जनतामा छाएको निराशालाई चिर्ने प्रयास गर्नेछु ।’

नवनियुक्त मुख्यमन्त्री यादवले अब संवैधानिक व्यवस्था अनुसार ३० दिनभित्र प्रदेशसभाबाट विश्वासको मत लिनुपर्नेछ ।