गृहसचिवसहित ७ सचिवको सरुवा: राजकुमार श्रेष्ठ गृहमा, दंगाल लोक सेवामा

काठमाडौं ।  सरकारले गृहसचिवसहित ७ जना सचिवको सरुवा गर्ने निर्णय गरेको छ। शुक्रबार बसेको मन्त्रिपरिषद् बैठकले एकसाथ ७ सचिवको जिम्मेवारी हेरफेर गरेको प्रधानमन्त्री तथा मन्त्रिपरिषद् कार्यालयका प्रवक्ता हेमराज अर्यालले जानकारी दिए।

मन्त्रिपरिषद्को निर्णय अनुसार गृह मन्त्रालयको नयाँ सचिवमा राजकुमार श्रेष्ठलाई पठाइएको छ। प्रधानमन्त्री तथा मन्त्रिपरिषद् कार्यालयमा कार्यरत श्रेष्ठलाई गृहको जिम्मेवारी दिँदै त्यहाँ कार्यरत रामेश्वर दंगाललाई लोक सेवा आयोगमा सरुवा गरिएको छ। नयाँ सरकार गठन भएको केही समयपछि गोकर्णमणि दुवाडीलाई हटाएर दंगाललाई गृहमा ल्याइएको थियो। तर उनी ३ महिनामै सरुवा भएका छन्।

यसअघि लोक सेवा आयोगमा कार्यरत किरणराज शर्मालाई प्रधानमन्त्री कार्यालयमा सरुवा गरिएको छ। श्रम, रोजगार तथा सामाजिक सुरक्षा मन्त्रालयका सचिव कृष्णहरि पुष्करलाई उपराष्ट्रपति कार्यालयमा पठाइएको छ। यस्तै राष्ट्रपति कार्यालयका सचिव दीपक काफ्लेले श्रम, रोजगार तथा सामाजिक सुरक्षा मन्त्रालयको जिम्मेवारी पाएका छन्। काफ्ले यसअघि सहसचिव हुँदा पनि श्रम मन्त्रालयमै कार्यरत थिए।

युवा तथा खेलकुद मन्त्रालयको सचिवको जिम्मेवारी लोकनाथ पौडेलले पाएका छन्। उनी यसअघि उपराष्ट्रपति कार्यालयमा कार्यरत थिए। यस्तै खेलकुद मन्त्रालयका सचिव डा. हरि लम्साललाई राष्ट्रपति कार्यालयमा सरुवा गरिएको छ। सरकारले प्रशासनिक कामलाई गति दिन उच्च तहका कर्मचारीको सरुवा गरेको जनाएको छ।