पोखराबाट काठमाडौं जाँदै गरेको बस धादिङमा दुर्घटना : १७ जनाको मृत्यु, २४ घाइते

पोखरा । पोखराबाट काठमाडौंतर्फ आउँदै गरेको यात्रुवाहक बस धादिङमा दुर्घटना हुँदा १७ जनाको मृत्यु भएको छ । गए राति करिब १ बजेर ३० मिनेटमा पृथ्वीराजमार्गअन्तर्गत धादिङको बेनिघाट रोराङ गाउँपालिका–५ भैँसेगौडामा बस दुर्घटना भएको हो ।

ग १ ख १४२१ नम्बरको बस सडकबाट अनियन्त्रित भई त्रिशूली नदीको किनारमा खसेको हो । दुर्घटनामा २४ जना घाइते भएका छन् । सशस्त्र प्रहरी बलका प्रवक्ता एवं डिआइजी विष्णुप्रसाद भट्टका अनुसार मृतक १७ जनाको शव घटनास्थलमै रहेको छ ।

दुर्घटनास्थलमा उद्धारका लागि सशस्त्र प्रहरी बल नेपाल विपद् व्यवस्थापन बेस आदमघाटबाट डिएसपी सुनिल गिरिको कमान्डमा टोली खटिएको छ । त्यस्तै, विपद् व्यवस्थापन तालिम शिक्षालय कुरिनटारबाट गोताखोरसहितको टोली पनि परिचालित भएको प्रवक्ता भट्टले जानकारी दिए ।

घाइतेहरूलाई उद्धार गरी उपचारका लागि विभिन्न अस्पतालतर्फ पठाइएको छ । मृतक तथा घाइतेको सनाखत हुन बाँकी छ । दुर्घटनाको कारण खुल्न सकेको छैन ।