पोखरा महानगरको ६७औँ स्थापना दिवस : रक्तदानमा ८० युनिट रगत संकलन

पोखरा ।  पोखरा महानगरपालिकाको ६७औँ स्थापना दिवसका अवसरमा रक्तदान कार्यक्रम आयोजना गरिएको छ । मंगलबार आयोजित कार्यक्रममा ८० युनिट रगत संकलन भएको छ ।

रक्तदानमा महानगरका कर्मचारी, नगर प्रहरी र स्वयंसेवी रक्तदाता सहभागी भए । रगतको अभाव टार्न स्थापना दिवसको सन्दर्भ पारेर कार्यक्रम गरिएको हो ।

पोखरा महानगरपालिकाका प्रमुख धनराज आचार्यले रगत उत्पादन गर्न र किन्न नसकिने बताए । मानवीय जीवन बचाउन रगत अपरिहार्य रहेको उनले उल्लेख गरे । ‘रगतको माग पूरा गर्न सबैले सहयोग गर्नुपर्छ,’ उनले भने ।

महानगरले स्थापना दिवस भव्य रूपमा मनाउने तयारी गरेको छ । दिवसका अवसरमा विभिन्न विधामा सम्मान कार्यक्रम राखिएको छ । महानगरले ‘पोखरेली नवरत्न सम्मान’ प्रदान गर्नेछ ।

कामको मूल्यांकन गर्दै कर्मचारीलाई पनि पुरस्कृत गरिनेछ । सर्वोत्कृष्ट, उत्कृष्ट र कर्तव्यनिष्ठ कर्मचारीलाई सम्मान गरिने महानगरले जनाएको छ । त्यस्तै सामुदायिक विद्यालयका शिक्षक र विद्यार्थीलाई पनि सम्मान गर्ने कार्यक्रम छ ।

उमेरको ज्येष्ठताका आधारमा ज्येष्ठ नागरिकलाई सम्मान गरिनेछ । यसलाई महानगरले ‘महानगर मातापिता सम्मान’ नाम दिएको छ ।