औषधि पसलमा 'लागु औषध ब्यूरोको प्रहरी' भन्दै रकम असुल्ने दुई जना पक्राउ

voiceofgandaki

काठमाडौं– काठमाडौंका विभिन्न औषधि पसलमा पुगेर प्रहरीको नक्कली परिचय दिँदै रकम असुली गर्ने दुई जनालाई प्रहरीले नियन्त्रणमा लिएको छ । 'हामी लागु औषध ब्यूरोबाट खटिएका प्रहरी हौं' भन्दै औषधि पसल सञ्चालकहरूलाई डर त्रास देखाउने उनीहरूलाई प्रहरी वृत्त बौद्धको टोलीले पक्राउ गरेको हो ।

पक्राउ पर्नेहरूमा सिन्धुपाल्चोकको नमोबुद्ध नगरपालिका ५ घर भई हाल गोकर्णेश्वर बस्ने ३७ वर्षीय 'आकाश' भन्ने नानी बाबु लामा र दोलखाको मेलुङ गाउँपालिका ६ घर भई काठमाडौं महानगरपालिका ६ बस्ने ३४ वर्षीय प्रकाश तामाङ छन् ।

प्रहरीका अनुसार उनीहरूले औषधि पसलहरूको खानतलासी गर्ने र 'तपाईंले लागु औषध तथा अवैध औषधिहरू बेच्नु भएको छ, हामी नियन्त्रणमा लिन्छौं' भन्दै सञ्चालकहरूलाई धम्क्याएर रकम असुली गर्ने गरेका थिए । उनीहरूलाई काठमाडौंको गोकर्णेश्वर नगरपालिका ६ स्थित एक औषधि पसलबाट प्रहरीले नियन्त्रणमा लिएको हो ।

पक्राउ परेका दुवै जनालाई काठमाडौं जिल्ला अदालतबाट ६ दिनको म्याद थप गरी अनुसन्धान अघि बढाइएको प्रहरीले जनाएको छ ।

प्रतिक्रिया