छात्रावासको माग गर्दै विद्यार्थीद्वारा कृषि क्याम्पसमा तालाबन्दी, पठनपाठन ठप्प

पोखरा । लमजुङको सुन्दरबजारस्थित कृषि तथा पशु विज्ञान अध्ययन संस्थानमा विद्यार्थीले तालाबन्दी गर्दा एक सातादेखि पठनपाठन र प्रशासनिक काम ठप्प भएको छ । छात्र र छात्रा दुवैलाई छात्रावास सुविधा दिनुपर्ने माग राख्दै बिएसएजी छैठौँ र सातौँ सेमेस्टरका विद्यार्थी आन्दोलित भएका हुन् ।

गत मङ्सिर ७ गतेदेखि ६९ जना विद्यार्थीले क्याम्पस प्रशासनमा तालाबन्दी गरेका छन् । तालाबन्दी भएको आठ दिन बितिसक्दा पनि समस्या समाधान नहुँदा क्याम्पस सञ्चालन हुन सकेको छैन । क्याम्पस प्रशासन र आन्दोलनरत पक्षबिच अनौपचारिक छलफल भए पनि ताला खुलाएर पठनपाठन सुरु गर्ने विषयमा ठोस सहमति जुट्न नसकेको क्याम्पस प्रमुख डा. रामकुमार श्रेष्ठले बताए ।

क्याम्पसमा हाल करिब ४५० विद्यार्थी अध्ययनरत रहेको प्रमुख श्रेष्ठले जानकारी दिए । उनका अनुसार हाल क्याम्पसको छात्रावासमा बढीमा २०० जना मात्र अट्न सक्ने क्षमता छ । सीमित स्रोतसाधनका कारण अहिले १५० जना छात्रालाई मात्र छात्रावासमा राखिएको छ ।

प्रमुख श्रेष्ठले भने, 'सबै विद्यार्थीलाई एकै पटक अट्ने संरचना नभएकाले व्यवस्थापन गर्न निकै चुनौतीपूर्ण छ । मेरिटको आधारमा विद्यार्थीलाई छात्रावासमा राख्ने गरेका छौँ ।'

तीन वर्षअघि विभिन्न विद्यार्थी संगठनबिच विवाद र झडप बढेपछि सहमतिकै आधारमा छात्रालाई मात्र छात्रावासमा राख्ने निर्णय गरिएको थियो । तर, अहिले छात्रहरूले पनि छात्रावास पाउनुपर्ने अडान राख्दै आन्दोलन चर्काएका हुन् । लामो समयदेखि क्याम्पस बन्द हुँदा विद्यार्थीको शैक्षिक गतिविधि प्रभावित भएको क्याम्पस स्रोतले जनाएको छ ।