औषधि व्यवसायीका समस्या समाधान उन्मुख : मन्त्री गौतम

काठमाडौं ।  स्वास्थ्य तथा जनसंख्यामन्त्री डा. सुधा गौतमसमक्ष नेपाल औषधि थोक व्यवसायी संघले ध्यानाकर्षण पत्र बुझाएको छ ।

मन्त्रालयमा आयोजित कार्यक्रममा मन्त्री गौतमलाई संघका अध्यक्ष गणेश नेपाल नेतृत्वको टोलीले ध्यानाकर्षण पत्र बुझाएको हो ।

सो अवसरमा मन्त्री गौतमले औषधि व्यवसायीका पछिल्लो पटक देखिएका समस्याबारे आफू जानकार रहेकाले माग सम्बोधन गरिने बताइन् । उनले औषधि व्यवसायीका समस्याबारे आफूले मन्त्रालयमा पनि छलफल गरिसकेको बताइन् । उनले भनिन्, ‘हामी सहमति सहकार्यमा विश्वास गर्छौँ । थोक व्यवसायी संघले राखेका कुरा सहज रुपमा लिएकी छु । समस्या समाधान उन्मुख छ ।’

संघले औषधि ऐन, २०३५ को दफा ११ को उपदफा ५ कार्यान्वयन स्थगन गर्नका लागि ध्यानाकर्षण पत्र बुझाएको हो । ध्यानाकर्षण पत्रमा नवीकरण प्रक्रियालाई डिजिटल, पारदर्शी, छिटो तथा व्यवसाय मैत्री बनाउन, प्रशासनिक ढिलाइ र प्रणालीगत कमजोरीहरू पूर्ण रूपमा न्यूनीकरण गर्न आवश्यक कानुनी/प्राविधिक संरचना अविलम्ब कार्यान्वयन गर्न माग गरिएको छ ।

औषधि ऐनको दफा ११ को उपदफा (३) अन्तर्गत दोब्बर दस्तुर तथा समयसीमाको विषयमा समेत पुनरावलोकन गर्न आग्रह गरिएको छ । रासस