१६औँ गण्डकी प्रदेशस्तरीय राष्ट्रपति रनिङ शिल्ड बागलुङमा हुने

पोखरा ।  गण्डकी प्रदेश खेलकुद परिषद्ले १६औँ संस्करणको प्रदेशस्तरीय राष्ट्रपति रनिङ शिल्ड प्रतियोगिता बागलुङमा आयोजना गर्ने निर्णय गरेको छ । प्रतियोगिता आगामी माघ महिनाभित्र सम्पन्न गर्ने तयारी परिषद्को छ ।

परिषद्का सदस्यसचिव श्रीधर शर्माले अहिले पालिका र जिल्लास्तरमा छनोट प्रतियोगिता भइरहेको जानकारी दिए । उनले भने, 'प्रदेशस्तरीय प्रतियोगिता बागलुङमा गर्ने निर्णय भइसकेको छ, तर मिति भने तय हुन बाँकी छ ।' यसअघि १५औँ संस्करण गोरखामा भएको थियो ।

पछिल्लो समय प्रदेशस्तरीय प्रतियोगितालाई विकेन्द्रित गर्दै आलोपालो प्रणालीमा विभिन्न जिल्लामा आयोजना गर्ने गरिएको शर्माले बताए । खेलकुद गतिविधि र बजेटलाई जिल्ला तहसम्म पुर्‍याउने उद्देश्यले यस्तो नीति लिइएको उनको भनाइ छ ।

सदस्यसचिव शर्माले समयमै पालिकास्तरीय प्रतियोगिता नगर्ने स्थानीय तहलाई ध्यानाकर्षण गराइएको समेत बताए । तल्लो तहबाट छनोट भएर आएका खेलाडीले मात्र माथिल्लो तहमा प्रतिस्पर्धा गर्न पाउनेछन् । पालिकाबाट जिल्ला र जिल्लाबाट छनोट भएका खेलाडीले प्रदेशस्तरीय प्रतियोगितामा भाग लिनेछन् । त्यस्तै, प्रदेशबाट उत्कृष्ट ठहरिएका खेलाडीले केन्द्रीय राष्ट्रपति रनिङ शिल्डमा गण्डकीको प्रतिनिधित्व गर्नेछन् ।

परिषद्ले खेलाडी कल्याणकारी कोषमार्फत खेलाडीको वृत्तिविकास र सेवासुविधामा लगानी बढाएको दाबी गरेको छ ।