काठमाडौँ– नेपाली कांग्रेसका केन्द्रीय सदस्य डा. चन्द्र भण्डारीले पार्टीको आगामी १५औं महाधिवेशनमा सभापति पदमा उम्मेदवारी दिने घोषणा गरेका छन् । १४औं महाधिवेशनमा उपसभापतिको प्रत्यासी बनेका भण्डारीले सामाजिक सञ्जालमार्फत आफ्नो आकांक्षा सार्वजनिक गरेका हुन् ।
‘देश, जनता, प्रजातन्त्रको हित र संगठनको आवश्यकता जहाँ उभिन्छ, त्यहीअनुसार शून्यदेखि सयसम्म जसरी आवश्यक पर्छ, त्यसरी नै अघि बढ्न तयार छु,’ भण्डारीले लेखेका छन्, ‘साथीहरूको सुझाव, समयको माग र राजनीतिक बजारलाई सम्मान गर्दै कदम चाल्नुपर्छ ।’
महाधिवेशन कि निर्वाचन ? अन्योल कायमै
कांग्रेस केन्द्रीय समितिले पुस २६ गतेदेखि काठमाडौँमा १५औं महाधिवेशन गर्ने निर्णय गरे पनि समयको चापका कारण नेताहरू नै सशंकित छन् । फागुन २१ गतेका लागि तय भएको आम निर्वाचन र महाधिवेशनको तयारी (क्रियाशील सदस्यतादेखि तल्ला तहको अधिवेशन) एकैसाथ गर्नुपर्ने चुनौती कांग्रेससामु छ । तथापि, नेताहरूले नेतृत्व हत्याउन आन्तरिक दौडधूप तीव्र पारेका छन् ।
देउवाको उत्तराधिकारी बन्ने होड
विधानअनुसार वर्तमान सभापति शेरबहादुर देउवा अब सभापतिको उम्मेदवार बन्न पाउने छैनन् । गत भदौ २३ र २४ को राजनीतिक घटनाक्रमपछि देउवाले उपसभापति पूर्णबहादुर खड्कालाई कार्यवाहक सभापतिको जिम्मेवारी सुम्पिएका छन् । सक्रिय राजनीतिको उत्तरार्धमा रहेका देउवाको विश्वास जितेर नेतृत्वमा पुग्न संस्थापन पक्षमै आधा दर्जन नेता आकांक्षी देखिएका छन् ।
कार्यवाहक सभापति पूर्णबहादुर खड्का आफूलाई देउवाको स्वाभाविक उत्तराधिकारी ठान्छन् । यस्तै, पूर्वउपसभापतिहरू गोपालमान श्रेष्ठ, विमलेन्द्र निधि र प्रकाशमान सिंह पनि देउवाको समर्थन पाउने आसमा छन् । १४औं महाधिवेशनमा देउवालाई सघाएका निधि र सिंह यसपटक गुन तिर्नुपर्ने पक्षमा छन् ।
पूर्वमहामन्त्री कृष्णप्रसाद सिटौला पनि देउवाको सहयोगको अपेक्षामा छन् । १३औं र १४औं महाधिवेशनमा देउवालाई सघाएको भन्दै सिटौलाले दाबी पेस गरेका छन् । यस्तै, पूर्वमहामन्त्री शशांक कोइराला पनि देउवाको साथ पाए सभापति लड्ने मुडमा छन् ।
कोइराला र थापाबीच द्वन्द्व
संस्थापन इतर समूहबाट १४औं महाधिवेशनमा सभापतिको निकटतम प्रतिद्वन्द्वी बनेका डा. शेखर कोइरालाले तयारी तीव्र पारेका छन् । यद्यपि, सोही समूहका महामन्त्री गगन थापाले पनि सभापतिमा दाबी गर्ने संकेत गरेका छन् ।
संसदीय दलको निर्वाचनमा थापालाई सघाउने र महाधिवेशनमा कोइरालालाई सभापति मान्ने समझदारी भएको कोइराला पक्षको दाबी छ । तर, बदलिएको राजनीतिक परिस्थिति भन्दै थापा अघि बढ्न खोजेको भन्दै कोइराला पक्ष सशंकित बनेको छ ।
२६ मङ्सिर २०८२, बिहिबार ०६:०४ मा प्रकाशित
