‘जेनजी सुशासन योद्धा’ को सूची सिडिओको कार्यकक्षमा राख्न गृहको निर्देशन

काठमाडौँ– गृह मन्त्रालयले गत भदौ २३ र २४ गते भएको ‘जेनजी आन्दोलन’ मा ज्यान गुमाएका ४५ जना सहिदको नामावली सबै जिल्ला प्रशासन कार्यालयमा राख्न निर्देशन दिएको छ ।

मन्त्रालयले सोमबार ७७ वटै जिल्ला प्रशासनलाई परिपत्र गर्दै प्रमुख जिल्ला अधिकारी (सिडिओ) को कार्यकक्षमा तीन दिनभित्र विवरणसहितको सूची राख्न भनेको हो । गृहमन्त्री ओमप्रकाश अर्यालले आइतबार मृतकहरूलाई ‘जेनजी सुशासन योद्धा’ घोषणा गर्ने निर्णय गरेका थिए । सोही निर्णय कार्यान्वयनका लागि मन्त्रालयले मातहतका निकायलाई ताकेता गरेको हो ।

परिपत्रअनुसार अबको तीन दिनभित्र सबै सिडिओको कार्यकक्षमा आन्दोलनका सहिदहरूको तस्बिर र नामावली देखिने गरी राख्नुपर्नेछ । सरकारले यसअघि नै मृतकका परिवारलाई क्षतिपूर्ति र घाइतेको निःशुल्क उपचार गर्ने निर्णय गरिसकेको छ ।

के हो जेनजी आन्दोलन ?

मुलुकमा व्याप्त भ्रष्टाचार, राजनीतिक बेथिति र कुशासनविरुद्ध ‘जेनेरेसन जेड’ अर्थात् नयाँ पुस्ताका युवाहरूले गरेको स्वतःस्फूर्त विद्रोहलाई ‘जेनजी आन्दोलन’ का रूपमा चिनिन्छ । विशेष गरी गत भदौ २३ र २४ गते काठमाडौँ उपत्यकासहित देशका प्रमुख सहरहरूमा युवाहरू सडकमा ओर्लिएका थिए ।

कुनै निश्चित दलको झन्डा नबोकी राष्ट्रिय झन्डासहित सडकमा आएका युवाहरूको आन्दोलनले उग्र रूप लिँदा राज्यपक्षसँगको झडपमा ४५ जनाले ज्यान गुमाएका थिए । ‘नो नट अगेन’ र ‘प्रणाली सुधर’ भन्दै उठेको यही आन्दोलनको रापले तत्कालीन सरकार ढलेको थियो ।

सडकबाट उठेको यही आवाजलाई सम्बोधन गर्न वर्तमान अन्तरिम सरकार गठन भएको हो, जसले आगामी फागुन २१ गतेका लागि आम निर्वाचनको मिति तोकेको छ । युवाहरूको यही बलिदानीले मुलुकलाई नयाँ दिशा दिएको भन्दै सरकारले उनीहरूलाई ‘सुशासन योद्धा’ को सम्मान दिएको हो ।