भोलि आमनिर्वाचन : बिदामा पनि सरकारी कारोबार र उम्मेदवारको बैंकिङ सेवा नरोकिने

काठमाडौं ।  निर्वाचन आयोगले सार्वजनिक बिदाका दिनमा पनि निर्वाचनसँग सम्बन्धित आर्थिक कारोबार नरोकिने गरी व्यवस्था मिलाएको छ । भोलि (फागुन २१ गते) हुने प्रतिनिधिसभा सदस्य निर्वाचन र फागुपूर्णिमाका कारण सरकारले तीन दिन सार्वजनिक बिदा दिए पनि अत्यावश्यक बैंकिङ तथा वित्तीय सेवा सुचारु रहने आयोगले जनाएको छ ।

आयोगका अनुसार बिदाको समयमा वित्तीय कामकारबाहीमा असर पर्न नदिन महालेखा नियन्त्रक कार्यालयमार्फत राजस्व दाखिलाको प्रबन्ध मिलाइएको छ । कोष तथा लेखा नियन्त्रक कार्यालय (कोलेनिका) बाट निर्वाचनसम्बन्धी भुक्तानी निकासा र राजस्व संकलनलगायतका सेवा सञ्चालन गराइएको छ । प्रणाली सञ्चालनका लागि प्राविधिक जनशक्ति खटाएर निर्वाध सेवा प्रवाहको व्यवस्था मिलाइएको आयोगले स्पष्ट पारेको छ ।

नेपाल राष्ट्र बैंकले सरकारी कारोबार गर्ने एजेन्सी बैंकहरूलाई सेवा सुचारु राख्न निर्देशन दिएको छ । यस्तै, राजनीतिक दल र उम्मेदवारको निर्वाचन प्रचारप्रसारसम्बन्धी खाता रहेका बैंक तथा वित्तीय संस्थाबाट रकम जम्मा गर्न तथा भुक्तानी लिन सकिने गरी आवश्यक व्यवस्था मिलाइएको छ ।

यद्यपि, मतदानको दिन (फागुन २१ गते) भने देशभरका मतदाता मतदानमा सहभागी हुनुपर्ने भएकाले सर्वसाधारणका लागि वित्तीय तथा बैंकिङ सेवा पूर्ण रूपमा बन्द रहनेछन् । आयोगका प्रवक्ता नारायणप्रसाद भट्टराईले मतदानको भोलिपल्ट अर्थात् फागुन २२ गतेदेखि भने सबै सेवा यथावत् सञ्चालन हुने जानकारी दिए ।