कांग्रेसको १५औँ महाधिवेशन : ६ हजार ७४३ वडामा पुग्यो क्रियाशील सदस्यता फाराम

काठमाडौं ।  नेपाली कांग्रेसले १५औँ महाधिवेशनका लागि १ सय ६५ निर्वाचन क्षेत्रमा क्रियाशील सदस्यता वितरण तीव्र पारेको छ । आगामी पुस २६ देखि २८ गतेसम्म काठमाडौंमा हुने महाधिवेशनका लागि तल्लो तहमा सदस्यता वितरणको काम भइरहेको हो ।

कांग्रेस केन्द्रीय कार्यालयका मुख्यसचिव कृष्णप्रसाद पौडेलका अनुसार ६ हजार ७४३ वडामा जनसंख्याका आधारमा सदस्यता वितरण भइरहेको छ । सबै निर्वाचन क्षेत्रमा फाराम पुगिसकेको र त्यहाँबाट वडाहरूमा पनि वितरण भइसकेको उनले जानकारी दिए । वडाहरूलाई फाराम भर्न र बुझाउन ५ देखि ७ दिनको समय दिइएको छ ।

यसपटक सदस्यता वितरणमा समावेशी मापदण्ड कडाइका साथ लागू गरिएको छ । नयाँ सदस्यतामा न्यूनतम ३० प्रतिशत युवा, ५० प्रतिशत महिला र १४ प्रतिशत दलित अनिवार्य समेट्नुपर्ने व्यवस्था गरिएको मुख्यसचिव पौडेलले बताए ।

सदस्यता वितरण र दर्ता प्रक्रियालाई प्रविधिमैत्री बनाइएको छ । मापदण्ड पूरा गरेका सदस्यको विवरण स्थानीय तहबाटै अनलाइन ‘इन्ट्री’ गर्नेबित्तिकै केन्द्रमा आइपुग्ने व्यवस्था मिलाइएको छ । यो प्रणाली १४औँ महाधिवेशनबाटै सुरु गरिएको भए पनि यसपटक थप सुदृढ र प्रभावकारी बनाइएको पौडेलले जानकारी दिए ।

महाधिवेशनका लागि निर्वाचन समिति गठन भइसकेको छ । मूल समारोह समिति, प्रचारप्रसार, आवास, भोजन तथा मञ्च व्यवस्थापनलगायतका अन्य समितिहरू सभापति र कार्यवाहक सभापतिसँगको परामर्शमा उचित समयमा गठन गरिने कार्यालयले जनाएको छ ।