काठमाडौँ । संघीय मामिला तथा सामान्य प्रशासन मन्त्रालयले विभिन्न स्थानीय तहमा पठाइएका प्रमुख प्रशासकीय अधिकृतलाई तत्काल आफ्नो जिम्मेवारीमा उपस्थित हुन निर्देशन दिएको छ ।
मन्त्रालयका अनुसार तोकिएको स्थानीय तहमा केही कर्मचारी नपुग्दा नियमित कामकाज प्रभावित भएको छ । त्यसैले सम्बन्धित निकायलाई तत्काल रमाना दिन भनिएको छ । मन्त्रालयले जनाएको छ कि प्रमुख प्रशासकीय अधिकृतका रूपमा खटाइएका उपसचिव र शाखा अधिकृतलाई निजामती सेवा ऐन तथा नियमावलीअनुसार चाँडै काममा पठाउन आवश्यक छ ।
स्थानीय सरकार सञ्चालन ऐन २०७४ को दफा ८४ को उपदफा ४ बमोजिम, विभिन्न मन्त्रालय, आयोग, सचिवालय तथा अन्य निकायमा कार्यरत कर्मचारीलाई प्रमुख प्रशासकीय अधिकृतका रूपमा तोकिएको हो । मन्त्रालयले यसलाई स्थानीय तहमा प्रभावकारी सेवा प्रवाह र वित्तीय सुशासन सुनिश्चित गर्ने उद्देश्यसहित गरिएको जनाएको छ ।
तर केही कर्मचारीले सरुवामा समस्या रहेको बताएका छन् । उनीहरूका अनुसार कतिपय सरुवा शारीरिक अस्वस्थता र कानुनी दायराभन्दा बाहिर पर्न गएको छ भने कतिपय सरुवामा काम प्रतिशोधको गन्ध आएको छ । यस्तो अवस्थामा उनीहरूले पुनर्विचार गर्नुपर्ने धारणा राखेका छन् ।
यद्यपि, पछिल्लो समय स्थानीय तहमा निमित्तको नाममा दीर्घकालीन जटिलता सिर्जना हुने अवस्थालाई अन्त्य गर्ने पहललाई भने कर्मचारीहरूले प्रसंसा गरेका छन् ।
