पोखरा १३ मा निशुल्क पुस २६ गते मुटु र मधुमेह शिविर हुने

पोखरा ।  पोखरा महानगरपालिका १३ मा आगामी पुस २६ गते शनिबार निःशुल्क बृहत मुटु तथा मधुमेह रोग शिविर आयोजना हुने भएको छ । वडा कार्यालयको प्राङ्गणमा हुने सो शिविरमा काठमाडौंको शहीद गंगालाल राष्ट्रिय हृदयरोग केन्द्रका वरिष्ठ विशेषज्ञहरुले सेवा दिने वडाध्यक्ष किरण बरालले जानकारी दिए ।

वडा कार्यालयले आयोजना गर्न लागेको यो शिविर बिहान १० बजेदेखि बेलुका ४ बजेसम्म सञ्चालन हुनेछ । शिविरमा मुटु तथा मधुमेह रोगको निःशुल्क परीक्षणका साथै इसिजी र इको जाँचको सुविधा समेत उपलब्ध हुने बरालले बताए । उनका अनुसार बिरामीहरुको रगतमा सुगरको मात्रा परीक्षण र आवश्यक औषधि वितरण समेत निःशुल्क गरिनेछ ।

यो स्वास्थ्य शिविरलाई सफल बनाउन स्व बोधराज बराल स्मृति प्रतिष्ठान र काहूँखोलास्थित जनकल्याण समितिले सहयोगी संस्थाका रुपमा साथ दिएका छन् । शिविरको समन्वय कुँडहरमा रहेको शहरी स्वास्थ्य केन्द्रले गरेको छ । वडावासीलाई घरदैलोमै विशेषज्ञ स्वास्थ्य सेवा उपलब्ध गराउने लक्ष्यका साथ शिविर आयोजना गरिएको बरालले बताए ।