बागलुङ नगरस्तरीय राष्ट्रपति रनिङ शिल्डको उपाधि चिल्ड्रेन लाइफलाई

बागलुङ ।  बागलुङ नगरपालिकास्तरीय आठौं राष्ट्रपति रनिङ शिल्डको उपाधि चिल्ड्रेन लाइफ बोर्डिङ स्कुलले जितेको छ । कुल ५९ पदक जित्दै चिल्ड्रेन लाइफ च्याम्पियन बनेको हो ।

विजेता विद्यालयले २४ स्वर्ण, १४ रजत र २१ कास्य पदक हात पार्‍यो । उपाधिसँगै चिल्ड्रेन लाइफले १ लाख ११ हजार १ सय ११ रुपैयाँ नगद, शिल्ड, मेडल र प्रमाणपत्र प्राप्त गरेको छ ।

प्रतियोगितामा अमर आदर्श मावि दोस्रो भएको छ । अमर आदर्शले १० स्वर्ण, १२ रजत र १६ कास्यसहित कुल ३८ पदक जित्यो । उपविजेता बनेको उसले ५५ हजार ५ सय ५५ रुपैयाँ पुरस्कार पायो । त्यस्तै, ५ स्वर्ण, ५ रजत र ५ कास्य गरी १५ पदक जितेको विद्या मन्दिर माविले तेस्रो स्थान हासिल गर्‍यो । उसले ३३ हजार ३ सय ३३ रुपैयाँ नगद पुरस्कार प्राप्त गर्‍यो ।

चिल्ड्रेन लाइफले शिल्ड जितेको यो दोस्रो पटक हो । अब हुने नवौं संस्करण पनि जितेमा विद्यालयले रनिङ शिल्ड सधैंका लागि आफ्नो बनाउनेछ ।

प्रतियोगितामा ६६ स्वर्ण पदकका लागि प्रतिस्पर्धा भएको थियो । नगरभित्रका ३० विद्यालय सहभागी भएकामा २२ विद्यालयले मात्र पदक जित्न सके भने अन्य विद्यालय पदकविहीन बने । विजयी खेलाडी र विद्यालयलाई नगर प्रमुख बसन्तकुमार श्रेष्ठले पुरस्कार वितरण गरे । सो क्रममा उनले शिक्षासँगै खेलकुद पनि अपरिहार्य भएकाले खेलकुद गतिविधिमा निरन्तर लाग्न विद्यार्थीलाई आग्रह गरे ।