एभरेस्ट एफएमको पाँचौं वार्षिकोत्सवमा घरबेटी र कर्मचारी सम्मानित, मानव सेवा आश्रमलाई १ लाख सहयोग,

पोखरा — पोखराबाट प्रसारण हुने एभरेस्ट एफएमले आफ्नो पाँचौं वार्षिकोत्सवका अवसरमा हेम्जास्थित मानव सेवा आश्रमलाई १ लाख १ रुपैयाँ सहयोग गरेको छ । संस्थागत सामाजिक उत्तरदायित्वअन्तर्गत आश्रममा 'एभरेस्ट कक्ष' निर्माणका लागि एफएमले बुधबार सो रकम हस्तान्तरण गरेको हो ।

एफएमकी अध्यक्ष कर्मकुमारी गुरुङले आश्रमका कास्की संयोजक सदीस पुनलाई चेक हस्तान्तरण गरिन् । एफएमले पहिलो वार्षिकोत्सवमा 'एभरेस्ट एफएम कक्ष' निर्माण गर्न ५ वर्षभित्र ५ लाख २५ हजार रुपैयाँ (सवा ५ लाख) उपलब्ध गराउने घोषणा गरेको थियो । सोही प्रतिबद्धताअनुसार यसअघि तीन किस्ता गरी ३ लाख ३ रुपैयाँ प्रदान गरिसकिएको र यो चौथो किस्ता भएको सम्पादक दीपेन्द्र श्रेष्ठले जानकारी दिए ।

अध्यक्ष गुरुङले एफएमको उद्देश्य सामाजिक सचेतना र सेवा रहेको बताइन् । आश्रमका प्रमुख पुनले सहयोगापेक्षीमुक्त समाज बनाउने अभियानमा एफएमको सहयोग महत्त्वपूर्ण रहेको भन्दै धन्यवाद दिए । वार्षिकोत्सवको सन्दर्भ पारेर एफएमले गत मंसिर ६ गते आयोजना गरेको रक्तदानमा १५१ युनिट रगत संकलन भएको थियो ।

रेजिना कटुवाल उत्कृष्ट कर्मचारी

वार्षिकोत्सवका अवसरमा एफएमले सञ्चारकर्मी रेजिना कटुवाललाई 'बेष्ट स्टाफ अफ दी इयर' घोषणा गरेको छ । वर्षभरिको कार्यसम्पादनका आधारमा उनलाई उत्कृष्ट कर्मचारी छनोट गरिएको हो । कटुवाल पोखरा बाहिर रहेकाले पछि विशेष समारोहमा ११ हजार १ सय ११ रुपैयाँ नगद, दोसल्ला र सम्मानपत्र प्रदान गरिने एफएमले जनाएको छ ।

घरधनीलाई सम्मान

आर्थिक मन्दीको समयमा घरभाडा छुट दिएर सहयोग गरेको भन्दै एफएमले घरधनी पुष्पेन्द्रबहादुर कोइरालालाई सम्मान गरेको छ । कोइरालालाई अध्यक्ष गुरुङ र सम्पादक श्रेष्ठले फेटा र माला लगाएर सम्मान गरेका हुन् ।