पोखराको चिप्लेढुंगामा केएफसीको २३औं शाखा

पोखरा ।  विश्वप्रसिद्ध फुड ब्रान्ड केएफसीले पोखराको चिप्लेढुंगामा नयाँ आउटलेट सञ्चालनमा ल्याएको छ। केएफसी नेपालको आधिकारिक फ्रन्चाइज देवयानी इन्टरनेसनल नेपाल प्रालिले २३औं आउटलेटका रूपमा चिप्लेढुंगास्थित सेल्वेज क्यास एन्ड क्यारीमा बिहीबारदेखि सेवा सुरु गरेको हो। सेल्वेजका अध्यक्ष कृष्णदेव प्रधानंग र पोखरा महानगरपालिका वडा नम्बर ४ का वडाध्यक्ष देवकृष्ण पराजुलीले संयुक्त रूपमा आउटलेटको उद्घाटन गरे। योसँगै पर्यटकीय सहर पोखरामा केएफसीको दोस्रो शाखा विस्तार भएको छ।

नयाँ आउटलेट सञ्चालनसँगै चिकेन प्रेमीहरूका लागि चिप्लेढुंगा आकर्षक गन्तव्य बन्ने कम्पनीको विश्वास छ। विश्वभर ‘उत्कृष्ट चिकेन’ का रूपमा चिनिएको केएफसीले ग्राहकलाई हट एन्ड क्रिस्पी चिकेन, चिकेन पपकर्न, चिकेन स्ट्रिप्स, जिन्जर बर्गर र केएफसी बकेटजस्ता स्वादिला परिकार पस्कँदै आएको छ। चिप्लेढुंगा शाखामा मात्रै १४ जनाले रोजगारी पाएका छन् भने देशभरका आउटलेटमा ४ सयभन्दा बढी जनशक्ति कार्यरत रहेको देवयानी इन्टरनेसनल नेपालका प्रमुख वित्तीय अधिकृत (सीएफओ) ऋतुराज शाहले जानकारी दिए।

कम्पनीले उद्घाटनको अवसर पारेर शुक्रबार विशेष छुटको व्यवस्था समेत गरेको छ। यो आउटलेट दैनिक बिहान ९ बजेदेखि राति ९ बजेसम्म सञ्चालन हुनेछ। सीएफओ शाहका अनुसार सेल्वेजसँगको सहकार्यमा खुलेको यो पहिलो आउटलेट हो। सन् २००९ मा नेपाल प्रवेश गरेको यस कम्पनीले पोखराको लेकसाइडमा सन् २०१७ मा पहिलो शाखा विस्तार गरेको थियो। कम्पनीले सन् २०२५ को डिसेम्बरसम्म देशभर शाखा संख्या २५ पुर्याउने लक्ष्य राखेको शाहले बताए।

नयाँ शाखा सञ्चालनको खुसीयालीसँगै केएफसीले क्रिसमस र अंग्रेजी नयाँ वर्षको अवसरमा ‘केएफसी सेलिब्रेसन अफर’ समेत सार्वजनिक गरेको छ। ग्राहकको रुचि र मागलाई मध्यनजर गर्दै केएफसीले नियमित रूपमा विभिन्न आकर्षक अफरहरू ल्याउने गरेको उनले बताए। कम्पनीले गुणस्तरीय सेवा र स्वादलाई प्राथमिकता दिँदै आफ्नो बजार विस्तारलाई तीव्रता दिइरहेको छ।