पोखराका विभिन्न स्थानबाट ३१.८ ग्राम ब्राउनसुगरसहित ५ जना पक्राउ

पोखरा– कास्की प्रहरीले पोखरा महानगरपालिकाका विभिन्न स्थानबाट लागूऔषध ब्राउनसुगरसहित ५ जनालाई पक्राउ गरेको छ । शुक्रबार (मंसिर १९ गते) खटिएको प्रहरी टोलीले उनीहरूको साथबाट कुल ३१.८ ग्राम ब्राउनसुगर बरामद गरेको हो ।

जिल्ला प्रहरी कार्यालय कास्की, इलाका प्रहरी कार्यालय शिशुवा र लागूऔषध नियन्त्रण ब्युरो पोखराको संयुक्त टोलीले विशेष सूचनाका आधारमा उनीहरूलाई नियन्त्रणमा लिएको हो । पक्राउ परेका सबैलाई कास्की जिल्ला अदालतबाट लागूऔषध सम्बन्धी कसुरमा ५ दिन म्याद थप गरी अनुसन्धान अघि बढाइएको प्रहरीले जनाएको छ ।

प्रहरीका अनुसार बुधबार दिउँसो २ बजे पोखरा–३१ बेगनासका ३० वर्षीय मिलन क्षेत्रीलाई १.८ ग्राम ब्राउनसुगर र मोबाइलसहित पक्राउ गरिएको थियो । प्रारम्भिक अनुसन्धानका क्रममा पोखरा–३० बेगनासतालका २१ वर्षीय अतीत थापाको पनि संलग्नता देखिएपछि उनलाई पनि नियन्त्रणमा लिइएको छ ।

सोही दिन दिउँसो ४ बजे पोखरा–३० शिशुवा बस्ने २३ वर्षीय हसन भण्डारीको कोठा खानतलासी गर्दा लुकाइराखेको अवस्थामा ११ ग्राम ब्राउनसुगर फेला परेको थियो । उक्त घटनामा संलग्न रहेको खुल्न आएपछि पोखरा–२७ शिशुवा बस्ने ३९ वर्षीय उदिप गुरुङलाई पनि प्रहरीले पक्राउ गरेको छ ।

यस्तै, साँझ ६ बजे पोखरा–२६ जलधारे बस्ने ४३ वर्षीय विक्की परियारलाई १९ ग्राम ब्राउनसुगरसहित पक्राउ गरिएको छ । उनको साथबाट एक थान डिजिटल तराजु र मोबाइल पनि बरामद भएको कास्की प्रहरीले जानकारी दिएको छ ।