गण्डकीमा खानी र विश्वविद्यालयसम्बन्धी दुई विधेयक प्रमाणीकरण

पोखरा ।  गण्डकी प्रदेश प्रमुखले प्रदेशसभाबाट पारित भई आएका दुईवटा विधेयक प्रमाणीकरण गरेका छन् । प्रदेश प्रमुखको कार्यालयले मंगलबार विज्ञप्ति जारी गर्दै 'गण्डकी प्रदेशमा खानी तथा खनिज पदार्थको अन्वेषण र व्यवस्थापन गर्न बनेको विधेयक' र 'गण्डकी विश्वविद्यालय (पहिलो संशोधन) विधेयक, २०८२' प्रमाणीकरण भएको जनाएको हो ।

नेपालको संविधानको धारा २०१ को उपधारा (२) बमोजिम ती विधेयक प्रमाणीकरण गरिएको कार्यालयका प्रवक्ता प्रविण पौडेलले जानकारी दिए ।

गण्डकी प्रदेशसभाबाट पारित तथा सभामुखबाट प्रमाणित भई मंसिर ९ गते ती विधेयकहरू प्रदेश प्रमुखको कार्यालयमा प्राप्त भएका थिए । विधेयकहरू मंसिर ११ गते प्रमाणीकरण भएको कार्यालयले जनाएको छ । प्रमाणीकरण भएसँगै अब यी विधेयकले ऐनको मान्यता पाउनेछन् ।