विशेष महाधिवेशनको माग नेतृत्वले बेवास्ता गर्‍यो : कांग्रेस नेता चालिसे

काठमाडौँ — नेपाली कांग्रेसको विशेष महाधिवेशन हस्ताक्षर अभियानले पार्टी नेतृत्वमाथि विधानअनुरूपको माग बेवास्ता गरेको आरोप लगाएको छ । बिहीबार काठमाडौँमा पत्रकार सम्मेलन गर्दै अभियानले ५५ प्रतिशत महाधिवेशन प्रतिनिधिको हस्ताक्षरसहितको मागलाई नेतृत्वले बेवास्ता गरेकोमा दुःख व्यक्त गरेको हो ।

अभियानका नेतृत्वकर्ता देवराज चालिसेले नियमित महाधिवेशनको मिति नतोक्ने र विशेष महाधिवेशनको माग सम्बोधन नगरेर केन्द्रीय समिति लम्ब्याइरहने नेतृत्वको शैली जिम्मेवार नभएको बताए । ‘नियमित महाधिवेशनको मिति तोक्न समेत आनाकानी गर्ने, विशेष महाधिवेशनको मागलाई सम्बोधन नगरी केन्द्रीय समितिको बैठकलाई अनावश्यक रूपमा लम्ब्याइरहने प्रवृत्ति कुनै पनि हिसाबले जिम्मेवार नेतृत्वको परिचय होइन,’ चालिसेले भने ।

उनले पार्टीको आन्तरिक जीवन र महाधिवेशन प्रक्रियामा देखिएको लामो अन्योल तथा निर्णयहीनताको सम्पूर्ण जिम्मेवारी वर्तमान केन्द्रीय नेतृत्वले लिनुपर्ने बताए । करिब ५५ प्रतिशत महाधिवेशन प्रतिनिधिहरूले पार्टी विधानअनुसार वैधानिक रूपमा अघि सारेको मागलाई नेतृत्वले आजसम्म सुनुवाइ नगरेको अभियानको ठहर छ ।