पोखरा।
सूचना तथा सञ्चार प्रविधि क्षेत्रका नवीनतम आविष्कारहरूलाई एकै थलोमा प्रदर्शन गर्ने उद्देश्यका साथ पोखरामा आयोजना हुन लागेको १३औँ क्यान इन्फोटेक २०८२ को तयारी अन्तिम चरणमा पुगेको छ । कम्प्युटर एसोसिएसन नेपाल (क्यान) महासंघ कास्कीको आयोजनामा पोखरा–९, नयाँबजारस्थित पोखरा प्रदर्शनी केन्द्रमा यही मंसिर १७ देखि २१ गतेसम्म चल्ने मेलाका सबै स्टलहरू बुकिङ भइसकेका छन् । आयोजकका अनुसार सोमबार बेलुका ६ बजेसम्म नै मेलाका सम्पूर्ण स्टलहरू सफलतापूर्वक बुक भइसकेका हुन् ।
यस वर्षको प्रदर्शनीमा विश्वविख्यात डिजिटल सेक्युरिटी उत्पादक कम्पनी युएनभी (UNV) ले मुख्य शीर्षक प्रायोजकको भूमिका निर्वाह गरेको छ । विगतका वर्षहरूमा झैँ यस वर्ष पनि पोखरा उद्योग वाणिज्य संघले आयोजना गर्ने ३४औँ राष्ट्रिय औद्योगिक व्यापार मेलाकै परिसरमा क्यान इन्फोटेक सञ्चालन हुन लागेको हो । क्यान कास्कीका सचिव दामोदर ढुंगानाले यस बृहत् मेलाको महत्त्वपूर्ण अंशका रूपमा क्यान इन्फोटेकलाई उभ्याउँदा प्रविधि र उद्योग व्यापारबिचको अन्तरसम्बन्ध थप मजबुत बनेको बताए । प्रदर्शनी केन्द्रमा नयाँ संरचना निर्माण भइरहेकाले यसपटक सीमित संख्यामा मात्र स्टल राख्नुपरेको सचिव ढुंगानाले जानकारी दिए ।
मेलालाई थप ज्ञानवर्द्धक बनाउन विभिन्न अन्तरक्रियात्मक कार्यक्रमहरू तय गरिएको छ । मंसिर १८ गते बिहान ११ः३० बजे ‘जेन जी तथा एआई’ लाई मुख्य विषयवस्तु बनाएर डिबेट कार्यक्रम आयोजना गरिनेछ । त्यस्तै, २० गते आइसिटी र डिजिटल ट्रान्सफर्मेसनसम्बन्धी अन्तरक्रिया अर्थात् ‘टेक टक’ सञ्चालन हुने योजना रहेको आयोजकले जनाएका छन् । मेलामा क्यान महासंघका सदस्य संस्थाहरू लगायत विभिन्न राष्ट्रिय र अन्तर्राष्ट्रिय सूचना तथा सञ्चार प्रविधिसम्बन्धी कम्पनीहरूको उत्पादन र सेवाहरूको प्रत्यक्ष प्रदर्शनी रहनेछ ।
मुख्य प्रायोजक युएनभी एक विश्वस्तरीय डिजिटल सेक्युरिटी कम्पनी हो, जसको नेपालका लागि आधिकारिक वितरक इगल टेक नेपाल रहेको छ । यस कम्पनीले नेपालभर २५० भन्दा बढी डिलर नेटवर्कमार्फत अत्याधुनिक सुरक्षा तथा अफिस अटोमेसन सामग्रीहरूको बिक्री–वितरण गर्दै आएको छ । प्रदर्शनीमा युएनभीले सिसीटिभी क्यामेरा, मोनिटर, स्टोरेज डिभाइस, रातमा पनि स्पष्ट दृश्य दिने आउल भ्यू आइपी क्यामेरा, युपिएस, स्मार्ट बोर्ड र नेटवर्क उपकरणहरू लगायतका डिजिटल सुरक्षाका अत्याधुनिक समाधानहरू प्रस्तुत गर्ने जानकारी दिएको छ ।
क्यान महासंघ कास्कीका अध्यक्ष पुरुषोत्तम कुँवरले यस प्रदर्शनीलाई सूचना तथा सञ्चार प्रविधि (आइसिटी) क्षेत्रका लागि ‘ट्रान्सफर्मेसनल’ अवसरका रूपमा व्याख्या गरेका छन् । उनले यो इन्फोटेक केवल प्रदर्शनी मात्र नभएर प्रविधि प्रेमी, उपभोक्ता र व्यावसायिक निकायहरूका लागि एउटा जीवन्त मञ्च भएको बताए । यसले उपभोक्ताहरूलाई बजारमा आएका नवीनतम हार्डवेयर र सफ्टवेयरको प्रत्यक्ष अनुभव लिने मौका दिने अध्यक्ष कुँवरको भनाइ छ । सहभागी कम्पनीहरूका लागि यो एउटा शक्तिशाली प्लेटफर्म हुनेछ, जहाँ उनीहरूले आफ्ना उत्पादनहरूको बजार सर्वेक्षण गर्न, ग्राहकको अपेक्षा बुझ्न र दीर्घकालीन व्यावसायिक सम्बन्ध विस्तार गर्न सक्ने अध्यक्ष कुँवरले बताए ।
अवलोकनकर्ताहरूले व्यापार मेलाको परिसरमा स्थापित १३औँ क्यान इन्फोटेकमा सूचना तथा सञ्चार प्रविधिसम्बन्धी विविध स्टलहरूको अवलोकन गर्न पाउनेछन् । मेलाको प्रचारप्रसारमा पत्रकारहरूको सक्रिय एवं सकारात्मक सहभागिता रहने अपेक्षा पनि अध्यक्ष कुँवरले व्यक्त गरेका छन् ।
१७ मङ्सिर २०८२, मङ्गलबार ०६:०६ मा प्रकाशित
