वैशाखको १२ दिनमै विपदबाट २३ जनाको मृत्यु, ७३ जना घाइते

काठमाडौँ । वैशाख महिना सुरु भएयताका १२ दिनमा देशका विभिन्न स्थानमा भएका विपद्का घटनामा परेर २३ जनाले ज्यान गुमाएका छन् । राष्ट्रिय विपद् जोखिम न्यूनीकरण तथा व्यवस्थापन प्राधिकरणका अनुसार वैशाख १ देखि १२ गतेसम्म ४२२ वटा विपद्का घटना भएका छन् । यी घटनामा ७३ जना घाइते भएका छन् । विपद्का कारण ५२७ परिवार प्रभावित भएको तथ्यांक प्राधिकरणले सार्वजनिक गरेको छ ।

प्राधिकरणकी प्रवक्ता शान्ति महतले विपद्को पछिल्लो अवस्थाबारे जानकारी दिएकी छन् । उनका अनुसार यो अवधिमा सबैभन्दा बढी मानवीय क्षति आगलागीबाट भएको छ । आगलागीमा परेर ७ जनाले ज्यान गुमाएका छन् । यस्तै चट्याङ लागेर ४ र हावाहुरीका कारण ४ जनाको मृत्यु भएको छ । लेक लागेर २ र डुंगा पल्टिँदा २ जनाको ज्यान गएको छ । वन डढेलो, सर्पदंश, जनावरको आक्रमण र पहिरोबाट १–१ जनाको मृत्यु भएको महतले बताइन् ।

विपद्का घटनामा घाइते हुनेको संख्या पनि ठूलो छ । घाइतेमध्ये सबैभन्दा धेरै २४ जना आगलागीका हुन् । यस्तै सर्पदंशबाट १९ र जनावरको आक्रमणबाट १३ जना घाइते भएको प्राधिकरणले जनाएको छ । पछिल्लो २४ घण्टामा मात्रै विपद्का घटनामा ३ जनाको मृत्यु भएको छ । सोही अवधिमा अरु ७ जना घाइते भएका छन् ।

प्राधिकरणले विपद्जन्य घटनाबाट जोगिन उच्च सावधानी अपनाउन नागरिकलाई आग्रह गरेको छ । 'घटना भएमा तत्काल सम्बन्धित फोकल पर्सनलाई खबर गर्नुपर्छ' प्रवक्ता महतले भनिन् । उनले विपद्को समयमा तत्काल नजिकैको प्रहरी कार्यालय वा प्रशासन कार्यालयमा जानकारी गराउन समेत अनुरोध गरेकी छन् ।