प्रतिनिधिसभा निर्वाचन : ८८ दिन बाँकी, आजदेखि समानुपातिकको प्रक्रिया सुरु

काठमाडौँ– आगामी फागुन २१ गते हुने प्रतिनिधिसभा सदस्य निर्वाचन आउन अब ८८ दिन बाँकी छ । निर्वाचनको मिति नजिकिँदै जाँदा निर्वाचन आयोगले तयारीलाई तीव्र पारेको छ ।

आयोगले आइतबार (आज) देखि समानुपातिक निर्वाचन प्रणालीतर्फको कार्यक्रम सुरु गरेको छ । कार्यतालिका अनुसार राजनीतिक दलहरूले आज बिहान १० बजेदेखि अपराह्न ४ बजेसम्म समानुपातिक प्रणालीमा सहभागी हुन आयोगमा आवेदन दिनुपर्नेछ ।

यसरी आवेदन दिएका दलहरूको सूची मंसिर २४ गते सार्वजनिक गरिनेछ । आयोगका प्रवक्ता नारायणप्रसाद भट्टराईका अनुसार दलहरूले पुस १३ र १४ गते उम्मेदवारको बन्दसूची पेस गर्नुपर्नेछ । बन्दसूचीको अन्तिम नामावली माघ ३० गते प्रकाशित हुनेछ । कुल २७५ सदस्यीय प्रतिनिधिसभामा ११० जना समानुपातिक पद्धतिबाट निर्वाचित हुन्छन् ।

माघ ६ मा मनोनयन दर्ता

प्रत्यक्षतर्फको निर्वाचन कार्यक्रमअनुसार माघ ६ गते उम्मेदवारको मनोनयन पत्र दर्ता हुनेछ । सोही दिन उम्मेदवारको सूची प्रकाशन गर्ने तालिका छ ।

उम्मेदवारीमाथि विरोधमा उजुरी दिने समय माघ ७ गतेलाई तोकिएको छ । माघ ८ गते नामावली प्रकाशन हुने र ९ गते उम्मेदवारले नाम फिर्ता लिन सक्नेछन् । माघ ९ गते नै उम्मेदवारको अन्तिम नामावली प्रकाशन गरी निर्वाचन चिह्न प्रदान गरिने आयोगले जनाएको छ ।