आगामी प्रतिनिधिसभा निर्वाचनका लागि म्याग्दीमा नेपाली कम्युनिस्ट पार्टीले टुंगायो उम्मेदवार

म्याग्दी ।  नेपाली कम्युनिस्ट पार्टी म्याग्दीले आगामी फागुन २१ गते हुने प्रतिनिधिसभा निर्वाचनका लागि उम्मेदवारहरूको नाम सिफारिस गरेको छ। जिल्ला संगठन समितिको भेलाले प्रत्यक्ष र समानुपातिकतर्फका उम्मेदवारहरूको नाम सर्वसम्मत रूपमा टुंगो लगाउँदै केन्द्रीय कार्यालयमा सिफारिस पठाएको हो।

पार्टीको जिल्ला भेलाले प्रत्यक्षतर्फ ५ जनाको नाम सिफारिस गरेको छ। सिफारिसमा परेकाहरूमा अर्जुन बहादुर थापा, कृष्णकुमार विश्वकर्मा, बमबहादुर श्रीस मगर, टेकबहादुर विक र दुर्गा कार्की (बानियाँ) रहेका छन्। यी उम्मेदवारहरूलाई नेपाली वर्णानुक्रम अनुसार सिफारिस गरिएको जिल्ला समितिले जनाएको छ।

त्यसैगरी समानुपातिकतर्फ ६ जनाको नाम केन्द्रीय कार्यालयमा पठाइएको छ। समानुपातिक सूचीमा गोविन्द पौडेल, चन्द्रबहादुर घिमिरे, पुनम खड्का, मिना विक, दिलु बुद्धुजा र लाल बहादुर चर्मकार रहेका छन्। विसं २०८२ पुस १० गते बसेको जिल्ला भेलाले निर्वाचनका लागि यी नामहरू सर्वसम्मत रूपमा छनोट गरेको हो। जिल्ला संगठन समितिले आफ्नो निर्णय कार्यान्वयनका लागि पार्टीको केन्द्रीय संयोजकलाई पत्राचार समेत गरेको छ।