कांग्रेस सभापति गगन थापा पराजित : सर्लाही–४ मा रास्वपाका अमरेश सिंह १२ हजार मतान्तरले विजयी

सर्लाही ।  सर्लाही निर्वाचन क्षेत्र नम्बर ४ बाट नेपाली कांग्रेसका सभापति गगनकुमार थापा पराजित भएका छन् । प्रतिनिधिसभा सदस्य निर्वाचनको सार्वजनिक मतपरिणामअनुसार उनलाई राष्ट्रिय स्वतन्त्र पार्टी (रास्वपा) का उम्मेदवार डा. अमरेशकुमार सिंहले फराकिलो मतान्तरसहित पराजित गरेका हुन् ।

सिंहले ३५ हजार ६८८ मत प्राप्त गरी जित हासिल गरे । उनका निकटतम प्रतिस्पर्धी थापाले २२ हजार ८३१ मतमा चित्त बुझाउनुपर्‍यो । सिंहले कांग्रेस सभापति थापालाई १२ हजार ८५७ मतको भारी अन्तरले पछि पारेका हुन् ।

काठमाडौं क्षेत्र नम्बर ४ बाट चुनाव जित्दै आएका थापा यसपटक निर्वाचन क्षेत्र परिवर्तन गरी पहिलो पटक मधेस झरेका थिए । तर, सर्लाहीका मतदाताले उनलाई अनुमोदन गरेनन् । यसअघि सोही क्षेत्रबाट स्वतन्त्र उम्मेदवारका रूपमा निर्वाचित सिंह यसपटक रास्वपाबाट मैदानमा थिए ।

प्रतिस्पर्धामा नेकपा (एमाले) का उम्मेदवार अमनिशकुमार यादव तेस्रो स्थानमा रहे । उनले ९ हजार ३४३ मत प्राप्त गरेको निर्वाचन अधिकृतको कार्यालयले जनाएको छ ।